BUTUAN CITY- Gidasig ni Pangulong Ferdinand Marcos Jr. ang tanang Pilipino, ilabina ang mga nagtrabaho sa impormal nga sektor ug mga self-employed, nga magpadayon sa regular nga paghulog sa Social Security System (SSS) ug Pag-IBIG Fund aron maseguro ang ilang pinansyal nga proteksyon sa umalabot.
Sa iyang ikalimang State of the Nation Address (SONA), gipahibalo sa Presidente nga miabot na sa 44 milyon ang sakop sa SSS, lakip ang mga drayber, vendor, gig workers, ug job order ug contract of service workers, samtang padayon usab ang pagpalapad sa membership niini.
Gipasiugda usab sa Presidente ang dakong papel sa SSS, Pag-IBIG Fund ug GSIS sa paghatag og pinansyal nga tabang panahon sa emerhensya ug kalamidad.
Gikutlo usab ni Marcos ang padayon nga pagpatuman sa mga programa sa pabalay diin kapin 500,000 ka housing units na ang natukod o napondohan sa gobyerno, uban sa pagsaka sa maximum housing loan sa Pag-IBIG ngadto sa P10 milyon matag miyembro.
Dugang pa, gipahibalo usab niini nga hapit pito ka milyon ka OFWs na ang adunay insurance, misaka ang minimum wage sa mga OFW nga domestic workers, ug gipataas usab ang pensyon ug subsistence allowance sa mga retiradong uniformed personnel isip kabahin sa padayon nga suporta sa administrasyon.
