BUTUAN CITY- Gi-anunsyo ni President Ferdinand Marcos Jr ang pagpatuman og P10 matag litro nga pagkunhod sa presyo sa krudo alang sa mga public utility vehicle (PUV), nga adunay maximum nga 150 ka litro matag simana sulod sa tulo ka buwan.
Sa video message sa Presidente, sugdan ang nasangpit nga programa sa National Capital Region sunod simana ug palapdan usab sa mosunod nga mga adlaw hangtud nga mapatuman sa tibuok nasud.
Tumong sa maong lakang di lang aron makunhoran ang ilang mga gastos sa transportasyon kundi mapogngan usab ang pagsaka sa presyo sa pagkaon ug ang nag-unang palaliton. Gipasabot usab sa Presidente nga ipatuman usab ang fuel subsidy sa mga lehitimong gasolinahan nga aprubado ug gi-monitor sa Department of Energy aron masiguro nga dili kini ma-abosaran.
Gipasiugda sa Punong Ehekutibo nga ang programa parte sa paningkamot sa panggamhanan nga mapadayon ang hustong kahimtang sa panginabuhi sa mga Pilipino ug mapanalipdan ang ilang kaayohan.
Samtang, nagkita pag-usab ang UPLIFT Committee sa Palasyo Malakanyang aron hisgutan ang kataposang developments sa Middle East ug ang epekto niini sa nasud, hilabi na sa padayon nga pagsaka sa presyo sa krudo. Isip tubag, gi-anunsyos sa Presidente nga ipatuman sa Department of Transportation ang service contracting program sugod Abril 15. Ubos sa nasangpit nga programa, bayran ang mga operator ug driver og P40 hangtud P100 matag kilometro.
Sumala ni President Marcos, aduna usab dili mo-ubos 20% nga discount ang mga commuter. Sakop sa programa ang labing-minus 50,000 ka PUV, 1,000 ka operator, ug mo-abot sa 15 milyon ka pasahero sa tibuok nasud. Pukos kini sa mga rutang konektado sa tren ug primary bus routes aron mapahapsay ang dagan sa biyahe. Ipatuman ang programa sa off-peak hours ug butangan og GPS monitoring ang mga sakyan aron masiguro ang husto ug aktuwal nga serbisyo.
