BUTUAN CITY – Nadugangan og 23 ka bag-ong kumpirmadong kaso sa COVID-19 ang dakbayan sa Butuan base na sa resulta sa mga swab samples nga giproseso sa Butuan Medical Center kon BMC Molecular Laboratory.
Sa maong ihap, 18 ang nakuha tungod sa close contacts nila sa mga unang nagpositibo nga gilangkuban sa 12 nga taga-Brgy. Ambago samtang tag-tulo usab sa Brgy. Fort Poyohon ug Holy Redeemer.
Lima usab ang mga local transmission tungod sa kawala nila’y travel history sa mga lugar nga duna’y positibong kaso ug wala nila’y close contact sa mga nagpositibo kansa nabahin sa duha nga taga-Brgy. Limaha ug tag-usa sa Brgy. Ampayon, Doongan ug Mahogany.
Sigon ni Department of Health kon DOH-Caraga assistant regional director Dr. Gerna Manatad, nakatala na ang Butuan og ikatulong namatay sa COVID-19.
Sa kinatibuk-an, nakatala ang siyudad og 152 ka cumulative COVID-19 confirmed cases kondiin 110 kanila ang na-discharged na human nakarekober samtang 39 na lang ang kumpirmadong kaso.
Nanawagan ang ahensya ngadto sa tanan nga magpakabana ug musunod sa mga health protocols aron maprotektahan ang mata’g usa.
