BUTUAN CITY – Gikaminusan lang ni Major Francisco Garello jr, Civil Military Operations kon CMO Officer sa 402nd Brigade Philippine Army ang pagpanghimakak sa rebelding New People’s Army kon NPA sa alegasyong patay na sila Ka Maria Malaya, Ka Sandara og Ka Juaquin.
Sigon ni Major Garrello, mahulog lamang nga mga bakak ang pamahayag sa rebelding grupo kung dili nila kini sukipan og pruweba o ebidensya.
Sa eksklusibong pakighinabi sa Bombo Radyo Butuan, igo lang gibasa ni Ka Oto, usa sa mga tigpamaba sa rebeldeng New People’s Army kon NPA Northeastern Mindanao Regional Committee, ang gika-ingong opisyal nga sulat-pamahayag gikan kang Ka Maria Malaya kinsa usa sa gitu-uhan sa militar nga apil sa mga napatay.
Gani sa gibasang pamahayag, nakalatid nga unom lang matud pa og dili onse ang patay sa walhong grupo kansang usa ka adlaw lang nga operasyon gigastuhan matud pa administrasyong Duterte og 25.5-milyunes pesos.
Apan dihang gipangitaan og lig-ong ebidensya ning sibyahan kalabot sa gika-ingon niining buhi pa ang nasangpit nga mga rebel leaders, gibutyag ni Ka Oto nga ang maong sulat-pamahayag ang lig-ong ebidensya nga sila buhi pa dungan sa pagpasabot nga mu-abot ra ang panahong magpa-interview sila
Apan gihagit ni Major Garello ang mga rebelde nga motingog sa kahanginan o kaha mag-live streaming aron mapamatud-ang buhi pa sila.
Pasabot pa ni Garello nga ang kasundaluhan misangpot sa huna-huna nga patay na ang mga tag-as nga opisyal sa NPA base sa narekober nga mga ebidensiya sa lugar nga nahitaboan sa Zapanta Valley Comples, sa Surigao Del Sur.
Mas misamot pa ang ilang pagtoo nga patay na ang mga niini tungod kay hangtud ning panahona wala paman sila mitingog sa kahanginan bisan paman sa paghagit sa mga sundalo.
Sa katapusan, gi-awhag sa opisyal ang tanang rebelding nagkalisud na, nga dili magduha-duha sa pagsurender dungan sa paneguro nga ang mga niini hatagan sa seguridad, kaluwasan og makabag-o sa kinabuhi.
