BUTUAN CITY – Gikumpirma sa 401st Infantry Brigade, Philippine Army nga upat ka miyembro sa New People’s Army kon NPA nga gilangkuban sa tulo ka opisyal ug usa ka miyembro ang misurender sa nagkadaiyang unit niadtong weekend.
Nahitabo ang managsunod nga pagsurender sa Surigao del Sur ug Agusan del Norte niadtong Mayo 15 ug 16.
Sa hiniusang operasyon sa 75th Infantry Battalion ug 3rd Special Forces Battalion niadtong Mayo 15, misurender ang duha ka opisyal sa Regional Sentro De Grabidad sa North Eastern Mindanao Regional Committee (NEMRC) sa NPA.
Kini mao sila Lovilito Lamela alyas “Bero” o “Hapon,” squad leader, ug Gina Sawan alyas “LG,” medical officer sa grupo.
Gisurender usab nila ang usa ka AK-47 rifle, usa ka rifle grenade, usa ka scope, ug tulo ka magazine sa AK-47.
Niadtong Mayo 16, misurender usab si Eusebio Gultiano Peru alyas Lee/Pitong/Tarzan/Carpo sa Marihatag, Surigao del Sur.
Gitudlo usab niya ang gitaguan sa iyang R4 rifle nga dunay usa ka magazine ug unom ka bala sa Barangay Bayan sa nasangpit nga lungsod.
Samtang niadtong Mayo 15 mitahan usab si Cheryl Tremidal Neniel alyas “Melon,” miyembro sa Squad 2, Sub-Regional Sentro De Grabidad Westland sa NEMRC, sa Barangay Del Pilar, Cabadbaran City, Agusan del Norte.
