BUTUAN CITY – Nanghinam-hinam na karun ang unom ka mga delegasyon sa Pilipinas alang sa ipahigayong 2020 Tokyo Paralympics nga himuon karong Agusto 24 hangtud Septembre 5 ning tuiga nga gilangkuban sa tagduha ka mga atleta alang sa swimming ug athletics samtang tag-usa usab sa powerlifting ug taekwondo.
Sa eksklusibong pakighinabi sa Bombo Radyo Butuan kang Ernie Gawilan, usa ka Minadanaoan nga para-swimmer, gibutyag niining malaumon silang tanan nga makakuha og medalya sa ilang pagsalmot sa maong dakong sporting events sa kalibutan ilabina nga sub-sub ang ilang gihimong mga trainings sulod na sa pipila ka mga katuigan uban ang tabang sa gobyerno ingun man sa mga private sectors.
Bisan og andam na ang ilang delegasyon sa maong kompetisyon apan dili dakong hagit alang kanila ang mga contingents gikan sa Urupa ug sa Amerika nga parehong kusog usab kondiin ang uban kanila ila nang naka-agbat sa lahi nga kompetisyon samtang ang uban mga bag-o pa.
Sumala ni Gawilan, usa sa mga requirements aron maka-apil sa maong event mao ang dapat dunay deperensya sa panglawas kondiin sa iyang kaso, in-born na siya nga wala’y usa ka kamot ug walay duha ka tiil samtang ang iyang ka-uban sa powerlifting usa ka polio victim rason nga maghigda kini atol sa dula samtang ang atleta alang sa Athletics usab, partially blind.
Gisaysay pa ni Gawilan nga kaniadto lisud alang kanila ang pagbansay ilabina sa ilang kondisyon apan tungod sa disiplina ug determinasyon, nalabangan nila ang tanang klase sa mga pagsulay ug napadayon ang mga pagbansay tungod usab sa tumong nga makuha nila ang ilang pangandoy sa kinabuhi.
Gani gipasigarbo usab niini nga niadtong misalmot siya sa Asian Para-Games nga gisalmutan sa 45 ka mga nasud, nakakuha ang Pilipinas og 3 ka gold ingun man 2 ka silver.
Tungod niini gihatagan sila og pasidungog ug incentives gikan sa Philippine Sports Commission kon PSC ingun man sa gobyerno kansa katunga sa gigahin alang sa Olympic Games.
Mapasalamaton ang Mindanaoan para-athlete nga usa siya sa morepresenta sa nasud kondiin mubiya na sila padulong sa Japan karung Agusto 22.
