BUTUAN CITY – Gisaysay ni Atty. Levi Baligod, abogado sa 18 ka marines nga miatubang sa publiko, ang pamaagi sa pag-deliver sa menalita nga kwarta.
Sumala pa niini nga daghang mga contractors nga nakakuha og proyekto apan bisan og wala pa magsugod ang ilang project, nagsugod na sila og deliver sa mga menalita nga kwarta ngadto kang Zaldy Co sa balay mismo sa Pasay City lakip na usab sa penthouse sa Bonifacio Global City, Taguig alang kang Martin Romualdez.
Samtang sa pangutana usab bahin kang Pangulong Ferdinand Marcos Jr, maisugong gibulgar sa abogado nga naka-deliver ang mga marines og minaleta nga kwarta sukad pa niadtong 2022 hangtud sa unang bahin sa 2025.
Sumala pa niini nga base sa affidavit sa 18 ka marines, kapin sa 100 ka higayon na nga nakadeliver og minaleta nga kwarta sa forbes park og sa nataran sa malacanang lakip na sa balay mismo sa Ilocos Norte.
Tungod niini, gitumbok ni Atty. Baligod si Pangulong Marcos Jr nga maoy utok sa maong korapsiyon. Gipakita pa niini ang pamaagi sa pag-deliver sa kwarta gamit ang eroplano, helicopter, og van.
Sa dihang napangutana kung andam ba silang moatubang sa senate hearing ugaling ipatawag, tubag sa mga niini nga andam sila. Kamatooran sa ilang kaisog matud pa mao ang pagpakita sa ilang nawong sa publiko diin kadaghanan walay gisoot nga facemask o bisan unsang tabon sa ilang nawong.
Samtang kadtong nagsoot og facemask, gitangtang usab kini aron makita sa publiko base sa hangyu usab sa nakatambong sa forum.
