BUTUAN CITY – Giklaro ni Maricris Alas, igsoon ni Junemark Alas nga wala sila’y laing gidudahang nalambigit sa pagkawala sa iyang pag-umangkon nga si Lian Kim kondili ang pamilya ra sa iyang ig-agaw nga si Kenny June Tejada nga gika-ingong uyab-uyab sa bata.
Kini tungod kay nahanaw ang iyang pag-umangkon human ang bahad sa igsoon sa suspek ngadto kanila nga manabla sila tungod sa pagsulay sa paghikog sa suspek.
Sa eksklusibong pakighinabi sa Bombo Radyo Butuan, gibutyag ni Maricris nga dili laagan ang iyang pag-umangkon ilabina nga nagtungha pa kini sa grade 6.
Wala usab sila tabangi sa kapulisan pagpangita sa bata dihang ila kining gipa-blotter ug susamang response usab ang gihimo sa ilang mga barangay officials hiungdan nga wala na’y tarong kaon ang iyang inahan ug wala na usa’y tarong tulog rason nga desidiso na silang mupasaka og kaso.
Samtang gipadayag sa apuhan sa biktima nga si Marissa nga wala sila masayod kung unsaon pagresolba ang maong hitabo dungan sa panawagan ngadto sa iyang anak nga dili magpalabi sa kaguol tungod kay layo kini og gitrabahuan.
