BUTUAN CITY – Gikwestyon ni kanhi Ampayon, Butuan City Barangay Captain Dennis Felix Gonzaga kung nganong acknowledgement receipt ug dili official receipt ang gi-isyu ni Kapitan Rodencio Basubas Jr. ngadto sa mga mubayad sa yuta nga gi-acquire sa barngy alang sa relocation sa ilang mga residenteng wala’y kaugalingong yutang tarukan sa ilag balay.
Una nang gibutyag ni Kapitan Basubas nga gihatagan siya og pagtugot sa pamilya Briones nga may tag-iya sa yuta aron maoy modawat sa bayad sa yuta nga himoan lang og acknowledgement receipt isip pamatood sa bayad ug siya na usab ang magpadala ngadto sa tag-iya.
Apan alang kang Gonzaga sa pakighinabi sa Bombo Radyo Butuan, gipamugos niini nga ang acknowledgement receipt dili i-honor sa bangko aron masulod sa panudlanan sa barangay, butang nga dili ma-deposito ang kwarta tungod kay nanginahanglan kini og official receipt kon OR.
Buot pasabot wala ma-deduct ang kantidad nga gibayad sa nakapalit og yuta ngadto sa account sa barangay kansang kabag-uhan wala matud pa nakalatid sa Memorandum of Agreement kon MOA.
Gihingusgan usab niining illegal ang wala pag-deposit sa barangay sa kwartang gibayad alang sa luna ug ideretso na lang kang Briones.
Sumala ni Gonzaga, dapat proteksyonan ang interest sa gobyerno apan sa paghimo sa resolution sa kasamtangang administrasyon, wala na matod pa kini natuman dungan sa pagbutyag nga ang tanang barangay kagawad sa Ampayon ang mipirma sa maong resolution.
Sa katapusan dako ang pagtuo ni Gonzaga nga dunay salaod nga nahimo si Basubas ug gipamugos nga tungod gidiretso sa pag-forfeit ang maong yuta nagpakita lang matod pa kini nga dunay interes si Basubas sa pagbaligya niini.
Kung hisgutan usab ang authority ni Basubas nga gihatag sa tag-iya sa yuta dapat matod pa tan-awon ug rebyuhon og maayo kung angayan ba kini ipamaligya pag-usab.
