BUTUAN CITY – Gikasuhan na ang pito ka kadete sa Philippine National Police Academy (PNPA) nga nalambigit matud pa sa hazing nga migamit og muriatic acid batuk sa kapin 20 ka plebes sa Silang, Cavite.
Base sa taho sa Police Regional Office (PRO) 4-A, nag-atubang sa paglapas sa Republic Act No. 11053 ang liman ka 3rd Class Cadets ug duha ka 2nd Class Cadets.
Lakip usab sa mga gikasuhan ang usa ka Tactical Officer nga dunay ranggong Police Major ug usa ka Tactical Police Non-Commissioned Officer nga dunay ranggong Police Senior Master Sergeant tungod sa matud pa pagkulang sa pagbantay ug pagpatuman sa disiplina.
Gipasaka ang kaso sa Philippine National Police Criminal Investigation and Detection Group sa buhatan sa piskalya sa Imus City.
Sa imbestigasyon, migawas nga nahitabo ang insidente niadtong Abril 3 sulod sa PNPA barracks sa Silang.
Tulo ka kadete matud pa ang direktang gibubu-an og muriatic acid sa mga cadets student.
Tungod niini, nakahiagum og mga paso ang mga biktima, partikular sa ilang likod ug uban pang sensitibong parte sa lawas.
Naaresto sa follow-up operations ang tulo ka kadete nga gitudlong nag-unang nalambigit sa insidente.
Samtang gitaho usab nga gitan-aw lang sa uban pang kadete ang panghitabo og wala gelayon mi-aksyon aron pug-ngan ang pagpanakit.
