BUTUAN CITY – Dead on arrival sa ospital ang 15-anyos nga dalagita human nibangga ann iyang gimanehong motorsiklo sa kasugat na mini-van kagahapon sa alas-10:30 sa buntag sa national highway sa Barangay Lipata, Surigao City.
Angkas sa biktima nga si Jennelyn Mibulos Sabornido si Lea Mebulos Sabornido, 24-anyos, kinsa padayon pang gi-atiman sa ospital tungod sa mga samad nga iyang na-angkon.
Nasayrang mutabok unta ang motorsiklo sa mga biktima dihang kalit niining nasugat sa mini van nga gimanehuan ni Nemeul Laput Maratas, 48-anyos ug residente sa Purok 1, Barangay San Isidro, Tubod, Surigao del Norte.
Tungod sa kusog sa pagkabangga nilagpot ang duha resulta sa grabeng samad ug bun-og sa lawas nga ilang na-angkon.
Gikustodiya na sa Surigao City Police Station ang driver sa mini-van ug gi-andam na ang kasong reckless imprudence resulting in homicide and physical injury.
