BUTUAN CITY – Dakong pangutana alang kang Trento, Agusan del Sur Mayor William Calvez ang kawala’y koordinasyon ni PLt. Arnold Sarong ngadto sa mga opisyal sa Brgy. Sta. Maria ilabina kang Kapitan William Martinez dihang misulod kini sa sabungan resulta sa komosyon kondiin usa ka sabungero ang patay.
Sa eksklusibong pakighinabi sa Bombo Radyo Butuan, gipadayag ni Mayor Calvez nga daan nang nasayod ang police station nga duna’y matigayong derby sa Brgy. Sta. Maria tungod kay nag-isyu man siya og special permit tulo ka adlaw adiser ang maong kalihukan.
Gihatagan pa niya og furnished copy ang police station isip pagsunod sa patakaran sa National Inter-Agency Task Force sa ingon sila ang magbantay sa sulod og gawas nga bahin sa maong buwangan aron masuta kung nasunod ba ang health protocols.
Madumdumang atol sa derby, gisaysay ni Kapitan William Martinez nga kalit lang misulod sa rida ang pulis dayong guyod kang Arthur Hamboy ug gi-ipit sa iyang bukton ug gipusil sa dughan.
Sigon ni Mayor Calvez, kini nga panghitabo dili malimod sa maong pulis tungod kay klaro matud pa silang nakita sa mga sabungero.
Gipanghimakak usab niini ang nakalatid sa blotter book nga nangilog og armas ang namatay tungod kay base sa asuy sa mga nakasaksi, ang pulis lang ang nagpabuto sa armas ngadto sa biktima kinsa dihang nakadagan pa, gipusil pa niya pag-usab rason sa iyang pagkatumba.
Base pa sa saysay sa mga nakasaksi, ang na-angkon niining samad pinusilan sa tiil, iya matud pang tinuyuan.
Ang gusto lang sa mayor nga sa pag-imbestiga sa Regional Internal Affairs Service kon RIAS ug sa Agusan del Sur Police Provincial Office, mugawas ang kamatu-uran aron mahatagan og hustisya ang napatay niyang constituent.
