BUTUAN CITY – Hugot nga gisupak sa mga animal welfare advocates ang ordinansa sa Cabadbaran City nga mag-euthanize sa mga madakpang iro nga dili malukat sa ilang amo o kaha wala’y musagop paglabay sa usa ka semana.
Kini subay na sa nag-viral nga Facebook post sa Bombo Radyo Butuan nga nagpahibalo sa gikatakdang pagpatay sa lokal nga kagamhanan sa unom ka mga iro nga ilang nadakpan karong Dominggo, Abril 7, kung dili na kini lukaton sa ilang mga tag-iya o kaha wala’y musagop.
Sigon ni animal advocate Aileen Faye Satorre sa Community Alliance for Philippine Animal Welfare Society kon PAWS – Cabadbaran, dili solusyon ang pagpatay sa mga iro nga latagaw aron maminunsan na ang ilang presensya diha sa kadalanan nga maoy gitudlong hinungdan sa mga aksidente sa kadalanan ingon man sa natalang mga kaso sa rabis sa maong syudad.
Sigon ni Satorre, namapatud-an na kini dili lang sa mga siyudad dinhi sa Pilipinas nga nagpatuman sa susamang ordinansa isip pagsunod sa Anti-Rabies Act of 2007 kondili apil na usab sa ubang mga nasud sama sa India.
Gidugang ni Satorre nga niadtong duna pa sila’y animal shelter sa maong siyudad niadtong tuig 2021, ang tanang madakpang mga iro, ilang gipangsagop ug sila usab ang nangita og mga pet lovers nga musagop sa mga niini.
Ang pundong gigamit sa ilang operasyon, naggikan lang sa mga donasyon nga maoy ilang gigamit pagpalit og pagkaon sa mga iro ingon man sa mga bayrunon alang sa paglukat kanila.
Karon maglisod na sila pagsagop sa mga dinakpang iro tungod sa kawala na nila’y shelter human gipasira niadtong Disyembre 2022 tungod kay dili sila rehistrado sa Bureau of Animal Industry kon BAI.
