BUTUAN CITY- Gi-anunsyo sa Philippine Health Insurance Corporation (PhilHealth) nga ang mga Pilipinong lalaki nga ma-diagnose og early-stage prostate cancer makapahupay sa ilang kabalaka sa gasto pinaagi sa usa ka espesyal nga Z Benefit Package nga naghatag og P100,000 subsidy alang sa tambal.
Ang pakete gilaraw alang sa mga miyembro nga lalaki nga 70 anyos paubos ug sakop niini ang hospital room ug board, medisina, laboratoryo, operating room, ug professional fees sa tibuok proseso sa pagtambal. Aron masiguro ang hapsay nga transaksyon, gikinahanglan ang pre-authorization ug koordinasyon sa Z-benefits coordinator sa mga kontraktadong pasilidad sa nasud.
Base sa datos sa Department of Health, ang prostate cancer mao ang ikalima nga pinakakomong cancer sa Pilipinas ug ikatulo sa mga lalaki, human sa lung ug colorectal cancer, nga adunay kapin sa 19 sa matag 100,000 ka lalaki nga naapektuhan.
Gi-awhag usab ang publiko sa sayo nga screening ug detection aron mapalambo ang survival rate ug mas mapuslan ang medikal nga tabang nga gihatag sa gobyerno.
