BUTUAN CITY – Gihingusgan karon sa mga gang leaders nga sakop sa gihi-usang grupo na sa mga gangsters sa Haiti nga nailang “G9 Family and Associates”, ang pagmugna na og transitional council.
Sa eksklusibong pakighinabi sa Bombo Radyo Butuan, gibutyag ni Bombo international correspondent in Haiti Dr. Adrian Louie Zambo Atonducan nga nagpadayon gihapon ang gang war sa capital Port-au-Prince tungod kay tinguha sa gang nga higayong mamugna na ang transitional council, magtakda gilayon og eleksyon karong tuiga.
Sa pagkakaron, gipang-atake na sa “G9 Family and Associates” kansa gipangunahan ni Jimmy Ceresier kinsa naila usab sa bansag nga Barbecue, ang kabalayan rason nga anaa gihapon ang kagubot bisan sa kadalanan ug mga zones.
Gipasabot ni Fr. Atonducan nga ang zones mao ang central points sa Port-au-Prince nga gipaningkamutan sa kapulisan nga dili makontrola sa mga gangsters ilabina nga pipila sa mga lugar ang nakuha na nia rason nga dili na makalusot ang mga food aid.
Giklaro pa ni Fr. Atonducan nga kaniadto gamay lang ang gang wars nga mag-inatakihay sa usa’g usa apan tungod sa ilang paghi-usa na og pwersa batuk sa gobyerno rason nga wala na sila makaya pa sa mga pulis.
Ang kawala matud pa’y suporta sa ilang lokal nga mga sundalo apil na sa international military support ang hinungdan sa pagdako sa gang war nga tungod kay dili na mapugngan, miresulta kini sa pag-resign ni Prime Minister Ariel Henry.
