BUTUAN CITY – Hugot nga gisupak sa Kilusang Mangbubukid ng Pilipinas kon KMP ang sugyot ni Finance Secretary Benjamin Diokno nga kunhuran og 10 ngadto sa zero-porsiento ang taripa sa imported rice pinaagi sa Rice Liberalization Law kansa gi-uyunan usab ni Pangulong Ferdinand ‘Bongbong’ Marcos Jr.
Sa eksklusibong pakighinabi sa Bombo Radyo Butuan, gipadayag ni Kilusang Mangbubukid ng Pilipinas kon KMP chairman Danilo Ramos nga ang ilang pagbabag tungod kay kontra mag-uuma ug kontra-konsumidor kini nga lakang.
Giklaro sa opisyal nga dili kini bag-o nga lakang tungod kay niadtong panahon ni kanhi Pangulong Fidel Valdez Ramos, susamang saad ang gibuhian sa General Agreement on Tariffs and Trade-World Trade Organization kon GATT-WTO nga mubarato ang bugas uban sa mugnaong daghang apan karon mi-abot na sa 60-pisos ang kada-kilo sa bugas.
Ang epekto matud pa sa sugyot ni Diokno mao ang pagbarat pa og maayo sa humay sa mga mag-uuma tungod kay ang ani sa mga local farmers, dili na man paliton sa National Food Authority kon NFA kondili largo na sa mga traders.
