BUTUAN CITY – Imbestigahan sa provincial health office sa Agusan del Norte ang Nasipit District Hospital nga unang gidalhan sa 2-anyos nga batang namatay human nayab-an og usa ka tasang init nga kape.
Sa eksklusibong interview sa Bombo Radyo, gipadayag ni provincial health officer Elizabeth Campado nga grabe na ang kahimtang sa biktimang si Steve Calooy sa Purok 8, Brgy. Tagcatong sa lungsod sa Carmen sa maong lalawigan dihang gidala kini sa Agusan del Norte provincial hospital.
Sigon sa doktor, base sa chart sa pasyente, gi-refer kini sa ilang ospital lima ka adlaw human sa insidente kondiin gitupuksan gilayon kini og anti-tetanus sa resident physician nga si Dr. Benjamin Selim dihang ma-admit niadtong Lune sa alas-6:30 sa gabii.
Giresitahan gilayon kini og silver sulfadiazine pagkasunod adlaw hangtud nga gi-atiman na sa ilang surgeon nga si Dr. Wencesalo Abarquez.
Dinhi nasayran nga halos 50-porsiento sa lawas sa bata ang napaso og ulahi na dihang gi-refer kanila tungod kay dehyddrated na og luya na kini nga dili na gani halos muresponde bisan sa paghikap nga ilang himuon.
Sigon ni Dr. Campado, apil sa ilang sayron kung pila ka adlaw pa ang milabay adiser gidala sa mga ginikanan ang biktima sa Nasipit District Hospital og kung unsa nga aksyon ang gihimo sa medical staff aron kini maluwas. (Beth Ruiz)
