BUTUAN CITY – Gibana-banang mukabat sa 8.5-milyunes pesos ang damyos human gipang-ablihan sa mga rebeldeng New People’s Army kon NPA ang water gate sa prawn pond didto sa Purok 1, Brgy. Pili, lungsod sa Malimono, Surigao del Norte kagahapon.
Sa eksklusibong pakighinabi sa Bombo Radyo Butuan, gipadayag ni Police Staff Sergeant Pablo Cabajes Jr., ang duty investigator sa Malimono Municipal Police Station nga lima matud pa ka mga nagpa-ilang sakop sa Sandatahang Yunit Pampropaganda sa Guerila Front-16, Northeastern Mindanao Regional Committee, ang miduol sa care-taker ug gipatapok silang mga tabahante sa prawn pond dayong bahad nga wala’y mupalag. DInhi na gipang-ablihan ang lima sa walo ka mga boxes sa pond nga duna’y gilapdong 5 ka ektarya.
Dugang pa ni Cabajes, duna’y usa sa sa walo ka mga boxes ang anihunon na tungod kay matured na ang mga pasayan kondiin gibana-bana sa caretaker nga mukabat sa 2.5-milyunes pesos ang kantidad unta kung na-harvest na ang maong mga pasayan.
Giklaro usab ni Sgt. Cabajes nga wala’y gisulti ang caretaker nga nangayo og kwarta ang mga rebelde kinsa nagsugo pa sa mga tawong nagpuyo palibot sa prawn pond nga manguha na og mga pasayan kay ila kini. Samtang daghan usab sa maong mga binuhi ang na-anod padulong sa dagat.
Hinuon, wala’y tawong gipasakitan ang mga rebelde kinsa mibiya gilayon human sa ilang gihimong harassment.
