BUTUAN CITY – Naghanyag karon og 500-mil pesos nga reward money ang lokal nga kagamhanan sa Butuan City sa pagpanguna ni Mayor Ronnie Vicente Lagnada alang niadtong makatudlo ug makahatag impormasyon nga moresulta sa pagkasikop sa nagpusil-patay nila Brgy. Lumbocan SK Chairman Nelbert Gacosta ug Sto. Niño Barangay Chairman Florencio Cagas.
Kini human na-alarma ang kadagkuang opisyal sa lokal nga panggamhanan sa sunod-sunod nga pagpamusil-patay sa duha ka opisyal sa barangay.
Buot sa kadagkuang opisyal nga matabangan ang kapulisan sa paningkamut nga masulbad gilayon ang krimen ilabina nga gikabalak-ang makaapekto kini sa dagan sa ekonomiya sa Butuan.
Nasayrang daghan ang naglinya nga mga investors gikan sa sulod ug gawas sa nasud nga buot mobubu og puhunan sa dakbayan.
Mahinumdumang gipusil patay si SK Chairman Gacosta nidtong Hunyo 21 sa gabii samtang Hunyo 24 sa gabii usab gipusil patay si Barangay Chairman Cagas.
Padayon ang hugot nga koordinasyon sa LGU Butuan ngadto sa Butuan City Police Office aron pagsiguro nga magpabiling hapsay ug layo sa kakuyaw ang mga lumulopyo sa Butuan.
