BUTUAN CITY – Malampusong na-rescue sa mga otoridad ang usa ka Slovenian national human ang pila ka oras nga negosasyon dihang misaka sa poste sa kuryente kaganinang buntag sa Daproza Avenue, Barangay Dadiangas West, General Santos City kon GenSan.
Base sa video footage, daling gi-aghat sa mga pewsonahe sa Bureau of Fire Protection ang maong langyaw aron kini mikanaog na gikan sa gikatkatang poste sa kuryente.
Apan inay nga maminaw, milatay na hinuon kini sa wires sa kuryente hinungdan sa paghugyaw sa mga tawo sa pagtuong matagak kini apan nakakumpayot pa gamit ang iyang likod sa tuhod.
Sa pagkakaron, gidala na sa balay tambalanan ang maong langyaw alang sa medical assistance tungod sa na-angkon niining mga minor injuries sa iyang kalawasan.
Nasayrang una na kining gikustodiya sa Pendatun Police Station ning miaging semana tungod usab sa pagsuway niini pg ambak sa usa ka hotel nga iyang temporaryong gipuy-an ug iyang ginapasakitan ang iyang kaugalingon ug ning nakalabay usab, nigawas na usab kini sa bintana sa iyang gipuy-an ug misulay na usab pag-ambak sa maong building.
Hinoon sa nahitabo kaganina dali nga gipalong ang linya sa kuryente sa nasangpit nga poste aron dili makuryentihan ang maong langyaw.
