BUTUAN CITY – Gipangunahan ni Department of Education Secretary Sonny Angara ang national kick-off ceremony sa Brigada Eskwela 2026 nga gipahigayon kaganinang buntag sa Cabadbaran City National High School sa lalawigan sa Agusan del Norte.
Ang maong kalihukan nga simultaneous nga gihimo sa tibuok nasud, duna’y temang ‘Bayanihan sa Paaralan: Nagkakaisa para sa Kaayusan at Kaalaman’ ug gitambungan nila Cabadbaran City Mayor Judy Chin-Amante, Governor Ma Angelica Rosedell Amante ug Rep Dale Corvera.
Ang launching sa Cabadbaran City nagsilbing platform sa paghiusa sa stakeholders ug pag-highlight sa mga inisyatibo sa school infrastructures ug literacy.
Tumong niini nga magtinabangay ang komunidad sa paglimpyo, pag-ayo, ug pagpalig-on sa mga pasilidad sa eskwelahan kondiin gidili ang pagpangayo og kontribusyon gikan sa ginikanan ug estudyante tungod kay ang tanang kalihukan base sa boluntaryo nga partisipasyon.
Sa iyang pagpamulong, gipadayag ni Secretary Angara nga nakurat siya human nasayran nga siya ang unang kalihim sa DepEd nga nakabisita sa maong siyudad.
Human nakita ang mga lawak-tunghaan sa maong siyudad, misaad ang kalihim nga maggahin og 30-miyunes pisos aron magtukod og dugang mga classrooms.
Ang maong kantidad, lahi matud pa sa kada-tuig nga gitagana sa probinsyal nga panggamhanan ug sa congressional office ni Rep. Dale Corvera.
