BUTUAN CITY – Mukabat sa 141,600-pesos nga balor sa usa ka dakong sachet sa gitu-uhang shabu ang nakumpiska sa mga otoridad atol sa pag-serve nila sa search warrant kagahapon sa alas-singko sa buntag sa Barobo, Surigao del Sur.
Na-aresto sa mga otoridad ang usa ka illegal drugs personality nga nalista sa top 10 Priority Target isip High-Value Individual sa Police Regional Office (PRO) 13 nga si Rene Ameril, 62-anyos, residente sa Purok 2, Brgy. Poblacion, sakop sa maong lungsod.
Gi-isyu ang search warrant No.2021-35 niadtong Sabado sa Regional Trial Court, 11th Judicial Region, Branch 41 nga nakabase sa lungsod sa Cantilan, Surigao del Sur.
Gi-andam na ang kasong paglapas sa Republic Act No. 9165 kon Comprehensive Dangerous Drugs Act of 2002 nga ipasaka batuk sa suspek.
