BUTUAN CITY – Opisyal nang gilusad sa Butuan City Police Office (BCPO) ang Oplan Bisikleta Program atol sa seremonya nga gihimo sa BCPO Headquarters Grounds kagahapong adlawa bandang alas 6:00 sa gabii.
Gipangunahan ang maong aktibidad ni Acting City Director PCOL Restituto P. Lacano Jr., kauban si Konsehal Atty. Dennis M. Bacala, Chairman sa Committee on Peace and Order sa Sanguniang Panlungsod sa Butuan. Ang duruha ka opisyal parehong nagpadayag sa lig-ong suporta sa maong inisyatiba ang magpromotar sa kaluwasan sa kadalanan, environmental awareness, og lig-on nga police-community engagement.
Gitambongan ang maong aktibidad ni Pastor Ronnel Abendanio, BCPO Life Coach, miyembro sa BCPO Command Group, Station Commanders gikan sa BCPS3 og BCPS5, Company Commander sa BCMFC og piniling personahe gikan sa BCPS2, BCPS3, ug BCMFC.
Tumong sa Oplan Bisikleta nga nag-aghat sa paggamit sa bisikleta isip altenatibong pamaagi sa transportasyon samtang gipakusgan ang police visibility og mobility sa kumunidad. Gitumbok usab sa programa ang ka-importante sa disiplina diha sa dalan.
Ang Oplan Bisikleta usa ka pamaagi sa BCPO aron maustinar ang police visibility og mamintina ang patrol operations tunga-tunga sa padayong krises sa gasolina.
