BUTUAN CITY – Gi-atangan na sa daghang mga turista ingun man mga atleta sa tibook kalibutan ang himoong opening ceremony sa 2020 Tokyo Olympics didto sa Japan unyang alas-siete sa gabii.
Sa eksklusibong pakighinabi sa Bombo Radyo Butuan, gibutyag ni Bombo Samurai international correspondent Marco Brazil direkta gikan sa Tokyo, nga ubay-ubay na ang mga mi-abot kagahapon nga mga atleta.
Lakip sa gi-atangan karong adlawa ang nagkada-iyang diskarte sa mga atleta ingun man ang opening ceremony ilabina ang ipakita sa tagsa-tagsa ka mga nasud atol sa parada.
Taliwala sa nagtunhay pa nilang state of emergency tungod sa COVID-19, wala maapektuhi niini ang maong aktibidad tungod kay disiplinado usab ang mga tawo ingon man hugot nga gipatuman ang mga health protocols sama sa pagsuot permi sa facemask ug perming paghugas sa kamot o pag sanitize niini.
Gidid-an usab ang mga turista nga musulod sa nga event venues ug diha lang sila sa gawas nga bahin diin mahimong makatan-aw sa mga dula gamit ang dakong TV screen.
Gipasabot usab niining dili tanang atleta ang makasulod sa venue tungod kay ang mga duna lama’y dula ang tugutan ug human sa ilang performance, balik gilayon sila sa ilang gisak-an.
Sumala pa ni Brazil, muabot sa 70,000 ka mga indibidwal ang mamahimong makasulod sa stadium apan kadto lamang bakunado na usab.
Nasayrang gipangandaman pag-ayo sa Japan ang maong kalihukan ingon man gigastuhan usab og dako taliwa nga lugi na kini apan padayon gihapon ang Olympic.
Dugang pa ni Brazil nga kagahapon adlawa, dunay 3 na ka atleta gikan sa Pilipinas ang iyang nakita nga misulod na sa venue.
Samtang gipasigarbo usab sa Japan ang pagka-disiplinado sa mga Hapon tungod kay sukad nga nagsugod ang pandemya, wala magdeklara ang maong nasud og lockdown aron dili muhagba ang ekonomiya niini.
Gani sa pag-eskwela, anaa gihapon ang face to face ang pamaagi sa ilang pagtudlo sa mga studyante apan pabilin lang nga gisunod ang mga protocol aron dili matakbuyan sa sakit.
