BUTUAN CITY – Nagduso og sugyot-balaudnon si Senador Erwin Tulfo nga nagtinguha nga ipatuman ang prinsipyo nga “no work, no pay” bisan pa sa mga labing taas nga opisyal sa gobyerno.
Ilawom niini, dili lamang ang sweldo apan apil usab ang mga allowances, dili ihatag kung ang usa ka opisyal absent nga walay klarong rason o abiso.
Gipunting ni Tulfo nga dili patas nga ang mga ordinaryong empleyado sa gobyerno walay sweldo kung dili mosulod, samtang ang mga senador, kongresista, ug uban pang opisyal padayon nga makadawat og bayad bisan wala nagserbisyo.
Gihimong ehemplo niini si Senador Jinggoy Estrada nga boluntaryo nga mihunong sa pagdawat og sweldo sa panahon nga siya gi-aresto, nga alang kang Tulfo, mao unta ang pamatasan nga angay sundon sa tanan.
Na-mention usab niya ang kaso ni Senador Ronald “Bato” dela Rosa nga dugay nga wala nakatrabaho apan padayon gihapong nagdawatan og sweldo.
Sa kinatibuk-an, tumong sa balaodnon ang paghatag og patas nga pagtratar sa tanang empleyado sa gobyerno, aron ipakita nga ang serbisyo publiko adunay bugti nga responsibilidad ug dili angay hatagan og espesyal nga pribilehiyo ang mga anaa sa taas nga posisyon.
