BUTUAN CITY- Nagpabiling walay kasiguruhan ang posibilidad sa pormal nga negosasyon tali sa Estados Unidos ug Iran human gipahibalo ni US President Donald Trump nga adunay bag-ong pakigpulong nga mahimong “last chance” sa Iran aron makab-ot ang kasabutan ug malikayan ang dugang nga tensyon sa rehiyon.
Apan, gilimod kini sa Iranian Foreign Ministry, ug dayong butyag nga walay nakaiskedyul nga opisyal nga pakigpulong sa Estados Unidos ug wala usab silay delegasyon nga gipadala alang niini, samtang ang ilang kasamtangang pakig-estorya sa Oman may kalabutan lamang sa seguridad sa paglayag sa Strait of Hormuz.
Bisan nagpadayon ang tensyon human sa mga insidente sa maong agianan sa mga barko nga nakaapekto sa transportasyon sa lana ug seguridad sa kadagatan, aduna gihapoy paglaom ang pipila ka mga tigpataliwala nga mobalik ang diplomasya aron malikayan ang dugang nga kagubot.
