BUTUAN CITY – Mitaliwan na sa nakalabay nga adlaw 12 ang kanhi Philippine basketball standout ug two-time Olympian nga si Edgardo Roque sa edad nga 88-anyos, sumala sa basketball community sa nasud.
Si Roque usa ka iladong kanhi varsity player sa Jose Rizal University sa wala pa siya misulod sa commercial basketball league nga MICAA, diin nagdula siya para sa Ysmael Steel (1958–1963), YCO Painters (1964–1970), ug Mariwasa (1971–1973).
Sa international nga entablado, nahimong kabahin siya sa Philippine national basketball team ug nagrepresentar sa dagkong mga torneyo.
Apil niini ang 1960 Rome Olympics ug ang iyang pagkahimong alternate sa pool para sa 1968 Mexico Olympics.
Usa usab siya sa mitabang sa Pilipinas nga makadaog og bulawan nga medalya sa 1962 Asian Games, ug miapil sa lain-laing FIBA Asia Championship sa dekada 1960, lakip ang 1963, 1965, ug 1967 nga mga edisyon.
Nakadula usab siya sa 1964 Pre-Tokyo Olympic qualifiers ug nahimong kabahin sa 1967 FIBA Asia Championship-winning Philippine team.
Giila si Roque isip usa sa mga importanteng bahin sa bulawanong panahon sa Philippine basketball, ug dako ang iyang natampo sa kalampusan sa nasud sa international nga kompetisyon.
