BUTUAN CITY – Nadakpan ang usa ka kanhi pulis sa gipahigayong drug buy bust operation ning mi-aging alas-dos sa hapon didto sa Purok 3, Barangay Togbongon, Surigao City, sakop sa lalawigan sa Surigao del Norte.
Naila ang nadakpan nga si Cabadelo Responte Sanchez, alyas ‘Brasi’ kinsa kanhi sakop sa Dinagat Islands Police Provincial Office.
Sigon ni Police Regional Office kon PRO-13 regional director Brigadier General Joselito Esquivel Jr., mipalit ang usa ka poseur buyer gikan sa suspek og usa ka heat-sealed plastic sachet sa gidudahang shabu, nga gibana-banang mikantidad og 1,180-pesos.
Daling giposasan si Sanchez human niini gidawat ang usa ka libo ka pesos nga marked money gikan sa usa ka undercover policeman.
Nakuha usab gikan sa iyang posisyon ang usa ka libo ka pesos nga duna’y managlahing denominasyon uban sa kolor puti nga cell phone.
Migawas sa records gikan sa PRO13 nga misulod si Sanchez sa Philippine National Police niadtong tuig 2010 apan na-terminate paglabay sa duha ka tuig tungod sa iyang pag-AWOL kon absent without official leave.
Nasayrang gi-surveillance gilayon sa mga anti-narcotics operatives ang suspek sukad kini nalista isip usa sa mga Regional Top Priority Target Personalities sa illegal drugs sa PRO-13.
