BUTUAN CITY – Gidepensahan sa Palasyo Malacañang nga walay “premature” sa nahimong pamahayag ni Pang. Ferdinand Marcos Jr. mahitungod sa matud pa pagka-detain sa kanhe House appropriations panel chair nga si Zaldy Co sa Czech Republic.
Sigon ni Palace Press Officer Usec. Claire Castro, sakto ang impormasyon sa Pangulo nga si Co anaa sa kustodiya sa Czech authorities ug na-hold ang iyang paglihok, bisan og dili kini opisyal nga “arrest” sama sa gihimo sa Department of Justice (DOJ).
Gitin-aw usab ni Castro nga ang pulong nga “nahuli” nga gigamit sa Pangulo pangkatibuk-an ug mamahimong nagtumbok sa pagka-hold o restriction sa lihok ug dili kinahanglang legal arrest.
Una nang gikumpirma ni Justice Secretary Fredderick Vida nga wala na sa kustodiya sa nasud nga si Czech Republic si former Ako Bicol Party-list Rep. Zaldy Co.
Gikumpirma sa opisyal nga nakagawas na sa nasangpit nga nasud ang puganteng kanhe magbabalaod.
Nag-atubang si Co sa kasong graft ug malversation mahitungod sa matud pa anomalya sa 289-milyones pesos nga flood control project sa Naujan, Oriental Mindoro.
