BUTUAN CITY – Padayon ang pagdiskubri sa Criminal Investigation and Detection Group kon CIDG-Caraga sa mga propiedad o kabtangan ni Kabus Padatoon (KAPA) Community Ministry International Inc. founder Joel Apolinario na nakapangalan sa mga dummies.
Sa eksklusibong pakighinabi sa Bombo Radyo Butuan kang Col. Cholijun Caduyac, Regional Chief sa maong buhatan, nagpahigayon sila og financial investigation diin nakumpirma nga dunay 4 na ka propiedad si Apolinario nga gipangalan sa iyang mga dummies.
Lakip na niini ang wood processing plant sa Agusan Del Sur nga napalit matud pa ni Apolinario kang Vice Governor Samuel Tortor rason nga gipadalhan na nila og sulat ang bise gobenador lakip na ang kadumalahan sa wood processing plant subay na usab sa ilang imbestigasyon.
Sa Bayugan City usab dunay usa ka compound nga 2-mil ka metros kwadrado ang ilang gipaskilan nga under investigation tungod kay miyembro sa board of directors sa KAPA ang tag-iya niini.
Girekomenda nila ang pag-freeze sa mga properties ni Apolinario aron mabaligya sa ingon magamit nga pangbayad sa mga KAPA investors nga wala’y nakuhang pay-out dihang mabulabog ang operasyon niini.
