BUTUAN CITY – Padayon ang pagpanubay karon sa kapulisan sa Cabadbaran City, lalawigan sa Agusan del Norte aron makita na ang nahanaw nga magtutudlong sa Nelmar Viray nga taga-Brgy. Sto. Niño ning siyudad sa Butuan ug nagtudlo sa Tagbungabong Elementary School sa RTR, Agusan del Norte.
Sa eksklusibong pakighinabi sa Bombo Radyo Butuan, gipadayag ni PMajor Renel Serrano, station commander sa Cabadbaran City Police Station, nga na-missing ang biktima sukad pa niadtong Dominggo human nananghid sa iyang mga ginikanan nga mu-adto matud pa balay sa ilang school principal sa Cabadbaran City.
Sa paglakaw pa lang sa biktima, nakamatikod og pinasahing lihok ang mga ginikanan niini tungod kay wala kini dala nga mga papeles ug nagdali-dali pa hangtud nga misamot na ang ilang kabalaka dihang wala na kini maka-uli sa maong adlaw.
Duha ka mga persons of interest nga ila karong gi-trace base na sa subsob nga follow-up investigation nga ilang gihimo human gi-unlock ang laptop sa magtutudlo ug nakita ang convo niini ngadto kang Macky Tañola nga taga-Moncayo, Davao de Oro ka-uban ang usa ka Bryan Phil Coquilla.
Migawas sa inisyal nga imbestigasyon nga nagproblema kini ug si Tañola hangtud nga nakatug-an na nga nagsumbagay matud pa ang biktima ug si Tañola samtang didto sila sa baybayon sa Brgy. Tolosa sa Cabadbaran City kondiin gilumsan matud pa ang magtutudlo.
Mitukma matud pa ang gipadayag ni Coquilla human nga narekober na lang ang gi-abandona nang kolor blue nga motorsiklo sa biktima kilid sa minteryo sa Brgy. 12 sa Cabadbaran City.
