BUTUAN CITY – Dili matukib ang gibating kalipay sa usa ka amahan human nga nabalik gilayon kaniya ang iyang 9-anyos nga anak nga amang, pila ka minutos lang human nagpatabang sa Bombo Radyo.
Una nang emosyunal nga nanawagan ngadto sa katawhan si Nicanor Amora, residente sa Purok 1-B, Brgy. Ampayon ning siyudad, human nga nawala ang iyang anak kagabii nga si Jenric.
Una na niining gitu-uhang gidala kini og laing tawo tungod kay dili kini la-agan ug kung manumbay man, diha lang kini sa duol nga bahin.
Kagabii pa sila nagsugod pagpangita niini apan wala nila kini mapalgi rason sa pagdangop niini dinhi sa sibyahan.
Naghilak pa siyang nanawagan sa tanan nga makakita sa iyang anak nga idangop lang kini dinhi sa sibyahan o kaha sa buhatan sa kapulisan aron mabalik kanila ilabina nga luoy kaayo kini nga bata.
Apan paglabay sa pipila lang ka minutos human nakabiya sa sibyahan, miduol usab si Oneil Egkin nga taga-Purok 1 Brgy. Tiniwisan, bitbit ang iyang anak aron unta i-turn over kini dinhi sa sibyahan.
Gibutyag niining milabay sa tindahan nila sa iyang asawa ang bata kagabii sa may Poly-Sports Complex nga naghilak ug dihang dili makasulti, ila na kining gidala sa ilang panimalay aron didto na pakatulgon.
Plano matud pa nilang i-turn over kini sa Butuan City Police Station 4 apan mas gipili nilang una kining idangop dinhi sa sibyahan aron madunggan gilayon sa mga ginikanan kansa mao ang saktong lakang nga iyang gihimo.
Alayon niini hugot ang pagpasalamat ni Nicolas ngadto sa Kahitas-an ug kang Igken ingon man sa Bombo Radyo Butuan nga maoy nahimong instrumento aron luwas nga ma-uli kanila ang iyang anak.
