BUTUAN CITY – Patay nang napalgan kaganina ang 9-anyos nga batang babaye human ang kapin usa ka semana niyang pagka-missing sa bukirang bahin sa Sitio Tagbabacon, Brgy. Culit, Nasipit, Agusan del Norte.
Nasayrang sukad nga wala na maka-uli sa balay sa iyang lola sa sentrong bahin sa maong sitio ang biktimang si Jenelyn Nuñez, sukad niadtong mi-aging Miyerkules, Marso 3, wala’y hunong ang search and rescue operation sa mga barangay tanod, mga volunteers ug mga pulis hangtud nga napalgan na kining wala na’y kinabuhi.
Gitu-uhang gilugos ang biktima tungod kay wala na kini suot nga pangtaas ug duna pa’y mga samad sa lawas.
Padayon na ang pagpanubay sa kapulisan sa mga tawong anaa sa maong area niadtong panahuna aron matumbok ang mihimo sa linuog nga kremin ug mahatagan og hustisya ang nadangatan sa biktima.
Sa eksklusibong pakighinabi sa Bombo Radyo Butuan, una nang gipadayag ni Culit Brgy. Kapitan Joel Pepito, niadtong Martes pa lang, Marso 2, mi-uban ang biktima sa mga bata didto sa bukirang bahin sa Sitio Tagbabacon apan dihang gimingawan pagka-Miyerkules, nananghid matud pa kining mupa-uli sa iyang lola sa ubos nga bahin sa sitio ug nagsugod pagbaklay pasado alas-onse sa sayong udto apan wala kini maka-abot.
