BUTUAN CITY – Gipanghimaraot sa rebeldeng grupong New People’s Army kon NPA ang sayop matud pang presentasyon sa militar human napatay niadtong Sabado si George Madlos alyas Ka Oris.
Sa eksklusibong pakighinabi sa Bombo Radyo Butuan, gihagit ni Ka Diwa Habagat, ang tigpamaba sa NPA-Agusan del Norte, ang 4th Infantry ‘Diamond’ Division, Philippine Army nga pamatud-an ang gipasi-atab nilang napatay sa engkwentro si Ka Oris tungod kay wala matud pa’y engkwentrong natigayon niadtong tungura dihang napatay sa mga sundalo si Ka Oris sa Sitio Gabunan,Brgy. Dumalaguing, Impasug-ong, Bukidnon.
Bisan ang mga media entities, gihagit ni Ka Diwa nga susihon ang kamatu-uran sa gipasi-atab matud pa sa militar aron mabulgar kung unsa matud pa ka bakakon ang kasundaluhan.
Gipadayag pa niining ang pagkanaog ni Ka Oris uban sa iyang medic sakay sa motorsiklo, alang unta matud pa sa follow-checkup sa iyang gihambing sakit apan wala na maka-abot pa tungod sa maong hitabo.
Samtang subay sa target karon sa militar nga si Myrna Sularte kon Ka Maria Malaya na ang sunod nilang kuhaon, gipadayag ni Ka Diwa nga wala pa man mapatay si Ka Oris, gipangandaman na kining daan sa mga kadagkuan sa walhong grupo.
Kini ilabina nga ang ilang panig ug ang panig sa ilang kaaway, nag-iyahay og paningkamot nga makakuha og tag-as nga opisyal.
Hugot nga ginegar ni kanhi NPA rebel leader Ka Boom ang gipasi-atab ni Ka Diwa Habagat nga wala napatay sa engkwentro tali sa tropa sa kagamhanan si Ka Oris kinsa wala usab matud pa’y armas niadtong tungura.
Sa eksklusibong pakighinabi sa Bombo Radyo Butuan, gipadayag ni Ka Boom nga lehitimong engkwentro ang natigayon sa mismong kampo matud pa sa mga rebelde.
Tumong matud pa sa tumo-tumo ni Ka Diwa nga gi-ambush sa mga sundalo si Ka Oris, aron ipasi-atab sa katawhan nga dili makamaong maluoy ang kasundaluhan.
Ang maong hitabo mikalas usab matud pa sa uban niining mga ka-ubanan apan naka-focus lang ang pagmantala sa kamatayon ni Ka Oris tungod kay dakong lider kini sa walhong grupo.
Tungod sa kamatayon ni Ka Oris, subling gipanawagan ni Ka Boom ang uban pang anaa sa walhong kalihukan nga mutahan na sa sabakan sa balaud.
Dili na matud pa hulaton nga masusama sila sa nadangatan ni Ka Oris tungod kay ang tinuod nga kada-ugan, anaa matud pa sa pagsurender ug wala sa pakigbisog batuk sa kagamhanan samtang magtago-tago sa kabukiran.
