BUTUAN CITY – Misamot pa ang kadismaya ni US President Donald Trump sa pamaagi sa pagdumala sa Iran sa negosasyon aron mahunong ang gubat.
Sumala sa pipila ka aides ni Trump, mas seryoso na karon niyang gikonsiderar ang pagpadayon pag-usab sa dagkong combat operations kumpara sa nakalabay nga semana.
Nawad-an na matud pa og pasensya si Trump sa padayon nga pagsirado sa Strait of Hormuz, ingon man sa iyang pagtan-aw nga adunay pagkabahin-bahin sa liderato sa Iran nga nakababag sa paghimo og seryosong konsesyon sa nuclear talks.
Una nang gihulagway ni Trump nga ang pinakabag-ong tubag sa Iran “totally unacceptable” ug “stupid,” hinungdang adunay mga opisyal nga nagduha-duha kung andam ba gyud ang Tehran nga mosulod sa seryosong negosasyon.
Nakigpulong na pag-usab si Trump uban sa iyang national security team sa White House niadtong Lunes aron hisgutan ang mga sunod nga lakang.
Sumala sa mga sources, wala pa gilauman nga adunay dakong desisyon nga himuon sa dili pa ang biyahe sa presidente padulong sa China nga gitakdang mahitabo sa Martes sa hapon.
