BUTUAN CITY – Hugtanong gipanghimakak sa Office of the Senate Sergeant-at-Arms (OSAA) ang mikaylap nga impormasyong wala’y CCTV footage sa ikaduhang andana sa Senado subay sa natigayong pagpamusil niadtong Mayo 13.
Sigon sa opisyal nga pamahayag ni Retired Gen. Mao Aplasca, ang CCTV system sa Senado, migana ug naka-record ang mga nahitabo sa maong lugar.
Madumdumang niadtong Mayo 14, nadawat sa OSAA ang opisyal nga hangyo ni PCOL John K. Guiagui sa Criminal Investigation and Detection Group kon CIDG alang sa kopya sa mga CCTV footages.
Isip tubag, gihatag gilayon sa OSAA ang mga gipangayo niining kopya sa PNP sa susamang adlaw pinaagi sa ilang Integrated Electronics and Technical Section.
Gikum,pirma sa mga sertipikasyon ug acknowledgment receipts nga ang mga kopya sa CCTV tinuod, orihinal, ug wala gi-usab gikan sa opisyal nha sistema sa Senado.
Dugang pa sa OSAA, ang pagpakaylap og mga dili beripikadong impormasyon, makadaut sa integridad sa imbestigasyon, rason nga nanawagan sila nga maglaum lamang sa opisyal nga pamahayag gikan sa awtorisadong ahensya sa gobyerno.
