BUTUAN CITY – Miresulta sa pagka-angol sa mga trabahante sa Department of Public Works and Highways kon DPWH ang disgrasya nga natigayon pasado ala1:30 sa hapon kagahapong adlawa sa may Purok-1, Barangay Dumalagan, Butuan City.
Sa impormasyong nakuha gikan sa Butuan City Police Office, samtang padulong sa siyudad ang Kia Bonggo nga dunay temporary plate number 150809 pag-abot sa nahitaboan, niminor kini og dinhe na nabundol sa kusog nga dagang Kinglong Bus nga dunay body number 3484 nga gimanehuan ni Edgardo Gomez Acero Jr, 38-anyos, olitawo nga taga Purok-2, Barangay Dayawan, Villanuevam Misamis Oriental.
Tungod sa kakusog sa impact, natagak ang bonggo sa kilid sa kalsada og nakahiagum og mga pali sa kalawasan ang driver nga si Tirso Bintian Erong, 51-anyos nga taga P-5, Barangay Alubijid, Buenavista, Agusan Del Norte lakip na ang mga sakay niining sila: Rommel Magatenis, Nestor Aquino, Romel Lauro, Ric Escolano, Marjo Dospueblos, Joseph Misajon, Edgardo Gonzales og Lino Sabelino.
Daling nakaresponde usab sa panghitabo ang CDRRMO-ALIMAT diin ang tanang mga angol gidala sa Agusan Del Norte Provincial Hospital og Butuan Doctors alang sa medical nga pag-atiman.
