BUTUAN CITY – Ubay-ubay na nga mga pulis sa PRO-13 ang nataptan sa COVID-19 tungod sa padayon nilang paghimo sa ilang tahas isip mga frontliners.
Sa eksklusibong pakighnabi sa Bombo Radyo Butuan, gipadayag ni PCaptain Agustin Navarro, regional information officer sa PRO-13, bisan pa man sa nagkataas nga ihap sa ilang mga sakop nga nataptan niini, magpadayon gihapon ang ilang pagsilbi isip mga frontliners ilabina nga usa kini sa 3-point pivotal strategy nga gimando sa PNP chief ka-uban sa internal security ug away batuk sa ilegal nga druga.
Ang pagsaka sa gidaghanon sa ilang mga ka-ubanang nataptan sa coronavirus, wala magpa-ubos sa ilang morale paghimo sa ilang trabaho nga kanunay nilang gipahinumdum sa ilang lower units nga obserbahan kanunay ang mga health protocols aron makunhuran ang risgo sa pagbaton niini.
Sa pagkakaron, duna pa sila’y igong pundo alang sa ilang COVID-19 response ilabina alang sa mga frontliners rason nga padayon ang ilang mga programang panglawas alang sa pagpalig-on sa resistensya sa lawas sa mga anaa sa control points.
Apil niini ang paghatag kanila og mga saktong bitamina, alcohol ug uban pa.
Anaa pa ang pagpang-apod apod nila sa mga gikinahanglang personal protective equipment kon PPEs, face masks, face shields ug uban pa.
