BUTUAN CITY – Dungan nga magsubmite karong adlawa, Enero 9, og courtesy resignations ang tanang mga police colonels sa Police Regional Office kon PRO-13.
Kini ang kabahin gihapon sa suporta sa panawagan ni Department of Interior and Local Government kon DILG secretary Benjamin Abalos, nga boluntaryong mukanaog sa pwesto ang tanang full-fledged colonel ug generals sa Philippine National Police kon PNP alang sa internal cleansing niini.
Ang nag-inusarang heneral sa Caraga nga si Police Regional Office-13 Director Brigadier Gen Pablo Labra II pa lang ang nakasubmite sa iyang courtesy resignation dinhe sa rehiyon human kini nakabalik gikan sa kampo Crame.
Gibutyag ni Regional Director Labra, nga ang pagsunod sa kamanduan, pagpakita lamang sa kawala nila’y kahadlok nga mu-atubang sa mga hagit.
Nagtuo usab kini nga ang nasangpit nga lakang, makatabang aron matapos na ang mga pagduda o akusasyon nga gibato ngadto sa mga high-ranking officials sa Philippine National Police ilabina sa isyu sa illegal nga druga.
