BUTUAN CITY – Gikumpirma ni Association of Filipinos in Sri Lanka kon AFSRIL President Wil Emz Agcaoili nga tungod sa nagkagrabeng krisis sa ekonomiiya karon sa maong nasud, daghang mga overseas Filipino workers kon OFWs ang gipang-terminate sa ilang trabaho.
Gani kini karon ang iyang gi-atiman aron maresolba uban sa abag sa Philippine Embassy ug sa mga opisyal sa Department of Foreign Affairs kon DFA ug sa konsulada sa Pilipinas.
Kini ilabina nga duna unta’y daghang mga OFWs ang manguli na sa Pilipinas apan magduha-duha na tungod kay dili na man abagahon sa ilang mga amo ang ilang mga plane tickets pa-uli taliwa nga mao kini ang nakalatid sa ilang kontrata.
Sigon ni Agcaoili, kung ang mga OFWs pa ang mubayad sa ilang plane ticket, wala na sila’y madala nga bawon nga kwarta alang sa ilang pamilya.
Hinuon sa pagkakaron, nalinaw-linaw na ang maong nasud ilabina nga ang protesta sa mga Sri Lankans ila na lang ipaagi sa social media aron malikayan ang pagpangdakop.
Wala matud pa’y angayang kabalak-an ang ilang mga pamilya dinhi sa Pilipinas tungod kay normal pa gihapon ang sitwasyon sa maong nasud ug libre pa usab silang makagawas-gawas nga wala’y angayang kabalak-an sa ilang siguridad.
