BUTUAN CITY – Plano karon sa Canadian Conference of Catholic Bishops nga makigtagbo kang Pope Francis aron mahisgutan ang demand sa katawhan sa maong nasud ilabina sa mga gibansagang First Nation nga mangayo og pasaylo n-behalf sa mga kabanay sa mga batang napalgan mga kalabera na lang duol sa mga residential schools diin sila nagtungha.
Sa eksklusibong pakighinabi sa Bombo Radyo Butuan kang Bombo Canada correspondent Rodge Cultura direkta gikan sa London Ontario, gibutyag niining bisan og nagpadayon pa ang imbestigasyon sa kapulisan kalabot sa gipangsunog na nga mga simbahan sa upat ka mga lalawigan, apan klarong nagsugod kini dihang sunod-sunod nga wala’y markang lubnganan sa gatusang mga bata ang nadiskubrehan duol lang sa mga residential schools diin sila gipadala – ang tunghaan nga gidumala sa mga simbahang Katoliko.
Bisan matud pa si Prime Minister Justin Tradeu, hugot nga mikondena sa maong hitabo ug misaad nga patubagon ang mga responsable niini ug mga nagpasagad rason sa kadaghan sa mga batang namatay nga gitu-uhang tungod sa sekswal ug pisikal nga pag-abuso kanila.
Nagmugna na matud pa ang kagamhanan og Truth Commission nga maoy gitahasan pag-imbestigar sa mga nadiskubrehang lubnganan sa mga bata ug ang mugawas nga resulta sa imbestigasyon maoy himuong basehan sa kagamhanan sa pagpatuman unya og tukmang lakang aron mahatagan og hustisya ang nadangatan sa mga bata.
Gani atol sa pagsa-ulog sa Canada Day ning mi-aging adlaw, gisabayan kini og lihok-protesta sa katawhang nagsubo sa maong nadiskubrehan.
