BUTUAN CITY – Nadugangan pa ang mga indibidwal nga nanawagan alang sa pagpakanaog sa pwesto ni Vice President Sara Duterte isip kalihim sa Department of Education kon DepEd.
Sigon ni Manila 3rd District Cong. Joel Chua, dili mahimong pasagdan lang ni VP Sara nga batikuson na lang kanunay sa iyang pamilya si Pangulong Ferdinand Marcos Jr., ilabina nga membro siya sa gabinete niini.
Alang usab kang Bacolod City Mayor Albee Benitez, dili matud pa maayong tan-awon nga ang usa ka membro sa gabinete, mitambong sa rally nga mibatikos sa administrasyong Marcos.
Mas maayo matud pa nga mukanaog na lang kini sa pwesto aron mamintina ang integridad ug panaghi-usa sa administrasyon.
Samtang wala usab malipay si Iloilo Mayor Jerry Treñas sa gipakitang taras ni VP Duterte sa usa ka prayer rally sa mga supak kang Pangulong Marcos nga daw mi-uyon matud pa sa mga banat ngadto sa pangulo.
Lauman na lang matud pa nga mas daghan pang mga magbabalaud ug mga local chief executives ang magpagawas sa ilang sentimiento batuk kang VP Sara.
