BUTUAN CITY – Malampusong nasunog ang mga nakumpiskang pinalusot nga segarilyo sa nakalabay nga adlaw sa Prosperidad Municipal Police Station ubos sa pagpangulo ni PMAJ Jerry M. Fernandez, Acting Chief of Police, inubanan sa Criminal Investigation and Detection Group (CIDG) ADS PFU nga gipangulohan ni PSSg Mark Gregory Alzula, Chief Investigator, ug ni Eustaquio E. Estillore.
Timaan matud pa kini sa lig-on nga paningkamot batok sa ilegal nga negosyo.
Ang gisunog nga mga butang, nakumpiska atol sa legal nga operasyon niadtong miaging bulan sa Barangay Poblacion, Prosperidad, Agusan del Sur nga gihimo subay sa Republic Act No. 10643 (Graphic Health Warnings Law) ug uban pang balaod batok sa smuggling.
Human sa hustong dokumentasyon ug proseso sa korte, gimando sa hukmanan ang forfeiture ug pagsunog sa mga nakompiska nga butang diin gihimo kini base sa saktong pamaagi sa pag-dispose sa ebidensya aron masiguro ang transparency ug pagsunod sa balaod.
Gitambongan kini sa mga representante gikan sa Office of the Clerk of Court nga nagsiguro nga ang aktibidad gihimo sa malinawon, transparent, ug accountable nga paagi.
