BUTUAN CITY-Miabot sa 1,802 ka mga indibidwal ang nabakunahan ning miaging adlaw human nga gidagsa ang mga vaccination sites atol sa duha ka adlaw nga National Vaccination Day kun Bayanihan Bakunahan 3 sa dakbayan sa Butuan.
Gilangkuban kini sa 258 ka mga nabakunahan sa first dose, 1,089 sa second dose ug 455 ang nagpa booster.
Gawas sa mga vaccination posts sa syudad, gibisita usab sa mga healthcare workers ang Barangay Antongalon, Tiniwisan, Taguibo, MJ Santos, Maon, Dulag, ug Limaha ning miaging adlaw.
Kagahapon, sa Barangay Tagabaca, Maug, Ampayon, Villakananga, Tungao, ug Babag usab ang lugar nga gi-adtuan sa mga vaccination team nga gipangunahan sa City Health Office uban ang mga personahe sa Department of Health.
Padayon usab nga gihingusgan sa lokal nga panggamhanan sa Butuan ang pagpabakuna aron makab-ot ang target nga herd immunity ning syudad aron sa hingpit nga mahimong luwas na ang katawhan batok covid-19.
