BUTUAN CITY – Mas gipakusgan karon sa pwersa sa kapulisan ug militar ning rehiyon sa Caraga ang ilang presensya sa mga lugar nga duna’y padayong proyekto ang kagamhanan ilabina sa mga dapit nga mingaw.
Kini human ang gipahigayong joint security coordination meeting tali sa mga sakop sa Agusan del Norte Police Provincial Office ug 23rd Infantry Battalion, Philippine Army uban sa mga respresentante sa mga contractors ug mga opisyal sa kabaranggayan.
Sa eksklusibong pakighinabi sa Bombo Radyo Butuan, gipadayag ni police provincial director Col. Martin Gamba nga kabahin kini sa nagpadayon nilang kampanya alang sa ilang internal security operations ilabina nga padayon ang pagpang-harass sa mga rebeldeng New People’s Army ngadto sa mga lugar nga duna’y ongoing project ang gobyerno partikular sa ilang areas of responsibility nga gilangkuban sa mga lungsod sa Buenavista, Nasipit ug Carmen kon BueNasCar area.
Gidugang sa opisyal nga kabahin usab kini sa ilang suporta sa Ending Local Communist Armed Conflict kon ELCAC aron mahunong na ang pagsamok-samok sa mga rebeldeng magsigod ug pangilkil sa mga contractors.
Giklaro sa opisyal nga komitido silang protektahan ang mga contractors aron dili na mabiktima sa pagpanunog ang ilang mga heavy equipment higayong dili muhatag sa demand sa mga rebelde.
Ang ila lang gipangayo nga muhatag kanila og impormasyon ang mga contractors kalabot sa status sa ilang proyekto ug seguridad usab sa ilang mga ekwepo.
