BUTUAN CITY – Nagpahimangno si Pangulong Ferdinand Marcos Jr. sa publiko ilabina ngadto sa mga duna’y kakapas pagpalit og dinaghan na likayan ang pag-hoard og mga produktong petrolyo karong anaa pa sa krisis nga sitwasyon ang suplay sa lana.
Sigon sa Pangulo, bugtong ang mga konsumidor lang nga duna’y lehitimong panginahanglan ang tugutang mag-stock og gasolina o kaha diesel kondiin apil niini ang mga mangingisda, marine equipment operators, mga ospital, apil na kadtong mugamit og generator set alang sa ilang operasyon.
Gikondena sa pangulo ang mga insidente sa fuel theft ug uban pang iregularidad nga duna’y kalabutan sa lana.
Gipamugos sa pangulo nga makasusubo ug makalagot ang mga taho nga duna’y pipila ka mga indibidwal nga mapahimuslanon sa sitwasyon alang sa kaugalingong interest.
Apil sa mga reports nga naka-abot sa pangulo ang pagsibat sa usa ka motorista human magpakarga og gasolina ug wala na nagbayad apil na ang ilegal nga pagbalhin sa diesel sa pribadong sakyanan.
Gibutyag sa presidente nga delikado ang pag-stock og mga produktong petrolyo nga wala’y saktong butanganan tungod kay maghatag usab kini og peligro sa mga komunidad.
Importante nga huna-hunaon matud pa ang kaluwasan sa mga silingan ug likayan ang mga buluhatong mahimong musangpot sa trahedya.
