BUTUAN CITY – Malaumon ang mga Locally Stranded Inviduals (LSIs) nga nagpundo karon sa Bacoor, Cavite nga madayon na sa hingpit ang ilang pagpa-uli dinhi sa Caraga Region sa pagtapos na sa moratorium nga gi -aprubahan sa IATF-EID karong Hulyo 4.
Sa pagkighinabi sa Bombo Radyo Butuan, mapasalamaton si Wendelyn Obedencio, lumad nga taga Bayugan City, Agusan del Sur uban ang laing 21 niya ka mga kaubananang nagpundo sa usa ka garahian sa maong lugar.
Kini tungod kay wala sila gipasagdan tungod sa mga ayudang mi-abot kanila gikan sa mga coordinator sa LSIs, pribadong indibidwal, Cavite City ug Bayugan City-LGUs.
Mihatag usab kanila og financial assistance ang probinsyal nga panggamhanan sa Agusan del Sur kansa maoy naglukat og ticket sa lima ka kaubanang wala’y pangpalit.
Sigon ni Obedencio magpa-abot na lamang sila sa adlaw nga makapauli na sila dungan sa pagpadayag nga sa kasamtangan, anaa sila sa maayong kahimtang ug wala’y bisan usa kanila ang mibati og mga simtomas sa coronavirus.
