BUTUAN CITY – Gikadismaya ni Brgy. Kagawad Zephanee ‘Panpan’ Nietes sa Brgy. Libertad ning siyudad ang wala’y ayong serbisyo sa Butuan City Water District kon BCWD.
Sa eksklusibong pakighinabi sa Bombo Radyo Butuan, gitin-aw niini nga ang iyang pamahayag iyang personal nga kasinatian isip konsumidor sa BCWD ug dili isip konsehal sa iyang barangay.
Entrada pa niini, sukad sa pagkamatngon niya og buot dihang didto pa sila namuyo sa Brgy. Lumbocan hangtud nga namalhin na sila sa Libertad, wala siya sukad makasinati og buswak nga supply sa tubig kondili igo-igo lang nga tulo hinungdan nga duna’y laton kanunay sa sulod ug gawas sa ilang balay aron dili mawad-an og supply sa tubig.
Ang mas gikasakit niya karon nga nakasinati sa krisis sa tubig ning siyudad, mao ang post sa water district nga mihangyong mubayad matud pa og sayo ang mga konsumidor taliwa sa ilang kahibalo nga daghang mga barangay ning siyudad ang wala gayoy awas ang ilang gripo ug labaw nga wala usab makabenepisyo sa ilang watere rationing.
Ang iyang concern tungod kay ang stress nga mahatud sa kawala’y tubig, maghatag og negatibong epekto ngadto sa mga apektdo niini.
