BUTUAN CITY – Nalapas sa Pilipinas ang katungod sa mga biktima sa sexual slavery sa gibansagang mga ‘Malaya lolas’ kon kababayenan niadtong panahon sa ikaduhang gubat sa kalibutan nga nabiktima sa mga sakop sa Imperial Japanese Army atol sa World War II tungod sa kapakyas pagbayad alang unta sa ilang reparations kon pagpa-ayo.
Base kini sa 19 ka palid nga desisyong gipanakanaog sa United Nations (UN) kagahapong adlawa, Marso 8 human nasuta nga gilapas sa kagamhanan sa Pilipinas ang ilang obligasyon ilawom sa Convention on the Elimination of All Forms of Discrimination against Women (CEDAW) tungod sa pagdumili pag-assist sa mga Malaya lolas pagduso sa ilang mga claims batuk sa Japan.
Girekomenda usab sa UN nga ihatag sa Pilipinas ang full reparation apil na ang pagrekognisa ug pagpagawas og official apology ingon man pagbayad sa material ug moral damages, tungod sa padayong gi-antos mga diskriminasyon sa mga lola apil na ang ilang pagpa-ayo, rehabilitasyon ug kakontento.
Ang ubang mga importanteng highlights gikan sa CEDAW decision mao ang rekomendasyon nga mag-establisar ang Pilipinas og nationwide reparation scheme alang sa mga biktima sa war crimes, ingon man state-sanctioned fund aron mabayaran ang mga biktima.
Girekomenda usab nila nga magmugna ang Pilipinas og usa ka memorial kon handumanan aron mapreserba ang site sa Bahay ng Pula sa San Ildefonso, Bulacan, diin gidetine ug gi-torture ang kababayen-an niadtong tuig 1944.
Ang pinaka-importante sa tanan mao ang paghangyo sa UN nga i-integrate ang kasaysaysan sa mga biktima sa kagubot atol sa giyera, apil na ang kasinatian sa mga Malaya Lolas diha sa school curricula tungod kay ang handumanan, kritikal man ngadto sa sensitibong pagsabot sa kasaysayan sa mgakalapasan sa tawhanong katungod nga nahimo ngadto sa maong mga kababayen-an.
