BUTUAN CITY – Gipasakaan na og kasong adultery ug concubinage ang babaye ug lalaki nga pulis nga aktibong miyembro sa Police Regional Office (PRO-13) human nasapong naghilawas sulod sa usa ka gi-abangan nga kwarto sa Brgy. Bayanihan ning dakbayan sa Butuan.
Gikumpirma kini PRO-13 regional director PBGen Marcial Mariano Magistrado IV pinaagi sa iyang gipagwaas nga official statement kondiin gika-ingon nga pareho silang minyo.
Sa imbestigasyon, nasuta nga nasakpan sila sa bana sa babayeng pulis, hinungdan nga mipasaka kini og kaso ug apil na usab ang administrative case batok kanila.
Sumala sa PRO-13 spokesperson nga si PLCol Jennifer Ometer, naghatag na og pahimangno si General Magistrado sa tanan nilang sakop nga dili niya pasagdan ang mga binuhatan nga makadaot sa uniporme ug dungog sa organisasyon.
Gipasalig usab niya sa publiko nga walay espesyal nga pagtamod nga ihatag sa mga sakop nga nalambigit sa maong insidente.
